خطوط جرين باص

انطلاقة خطوط جرين باص للمرة الأولى في القاهرة يوليو 2021 كانت زي صدمة حضارية ومفاجأة غير متوقعة للمصريين مع ترحاب شديد وتوجس من استمرار الخدمة زي ما هي من غير تغييرات بعد انتهاء المرحلة التجريبية.

وجرين باص هي امتداد لشركة خطوط أمريكية بالاسم نفسه انطلقت للمرة الأولى سنة 1925 وتعتبر من أكبر شركات الخطوط في نيويورك وكمان بتقدم خدمات في كوينز ومنهاتن وغيرها، وحصل عليها تطورات كبيرة من سنة 2015 بعد وفاة مديرها جيروم كوبر واللي هو ابن وليام كوبر مؤسس الشركة، لتبدأ في العمل خارج أمريكا بعد أن اندمجت مع أكتر من شركة عالمية عملاقة لخطوط النقل والمواصلات.

 

مقالات ذات صلة

مواصلات القرية الذكية

مواصلات العاصمة الإدارية الجديدة

مواصلات سكك حديد مصر 2021

مواصلات من مطار القاهرة إلى رمسيس

مواصلات كايرو فيستيفال من رمسيس

 

إيه هي خطوط جرين باص؟

بدأت شركة جرين باص بخطين بس في القاهرة وهو مشروع تابع لهيئة النقل العام وتعتبر أول أتوبيسات ذكية في القاهرة ومن ماركة مرسيدس، وكمان مزوّدة بأحدث التقنيات العالمية سواء للأمان وراحة الركاب والتعامل مع السائق عن طريق التكنولوجيا.

وخطوط جرين باص هي:

·         الخط الاول واسمه جي 1 G1 وبيبدأ خط سيره من ميدان لبنان، وشارع عرابي، وميدان سفنكس، والزمالك، والتحرير والإسعاف، ورمسيس، والعباسية، وصلاح سالم، والكلية الحربية، وآخره في مطار القاهرة.

·         الخط الثاني هو جي 2 : G2وده بيبدأ من حدائق الأهرام وبيعدي على ميدان الرماية وشارع الهرم، وميدان الجيزة، وجامعة القاهرة، والدقي، والتحرير، ورمسيس، والعباسية، وجامعة عين شمس، والخليفة المأمون، وشارع الميرغني، وآخره في كلية البنات.

 

إيه هي مميزات خطوط جرين باص

·         سعر التذكرة 10 جنيه بس ودي بتجيبك زي ما إنت شايف من أول القاهرة لآخرها بدل ما تركب مواصلتين أو 3 خصوصًا فيه مناطق لسة موصلهاش المترو.

·         الواي فاي المجاني اللي بيسمح لك تشوف فيديهات أو تقوم بتحميل أي بيانات إنت عايزها أو حتى تشتغل طول المسافة الطويلة من أول الخط لآخره واللي رغم طولها إلا إنها ممكن تاخد ساعتين بالكتير بفضل الكباري والطرق السريعة اللي بين الميادين.

·         شاحن USB، يعني لو نازل مستعجل ونسيت تشحن موبايلك فممكن تشحنه عادي من الأتوبيس طول الطريق وزي ما معاد محطتك ييجي بس أوعى تنساه وتنزل، وممكن كمان توصل الموبايل بالشاحن وتتفرج على النت براحتك من غي خوف من إن الشحن يخلص.

·         شاشات التليفزيون، ودي فعلا من الحاجات المميزة جدًا واللي بتعجب كتير من الناس اللي ملهومش قوي في النت، فخطوط جرين باص مش بس بترضي الشباب الصغير اللي قاعد طول النهار على النت ولكن مجهزة برضه للسن الأكبر واللي هيستمتع جدًا بالرحلة مهما كانت طويلة.

·         النزول من الباص عن طريق الضغط على زرار في الكرسي، ودي برضه من الحاجات المميزة جدًا وبكده السائق مش هيقف في كل محطة على الفاضي أو تضطر تنده من بعيد أو تقع وإنت بتمشي قبل وقوف الأتوبيس.

·         الدفع عن طريق الفيزا أو الأبليكيشن وده ممكن يكون عائق شوية قدام المصريين اللي لسة متعودوش قوي على طريقة الدفع الإلكترونية، ولكن خلال كام شهر أكيد الموضوع هيكون أسهل عليهم خصوصًا مع ربطه ببطاقات ميزة وبطاقات المعاشات وغيرها.

·         مواعيده كويسة جدًا وبينطلق أول أتوبيس من 6.30 صباحًا وآخر أتوبيس بيطلع من المحطة 10.5 مساء، يعني هيغطي كل اللي مواعيدهم بدري أو متأخر.

 

أبلكيشن جرين باص

أبلكيشن جرين باص هو تطبيق لازم تنزله على موبايلك سواء وإنت في الأتوبيس أو الأحسن قبل ما تركب، فهو بيبين لك أقرب أتوبيس فاضله قد إيه ويوصلك بالإضافة لاستخدامع في دفع ثمن التذكرة والتعرف على مواعيد الباصات عمومًا وأي معلومات عن الخدمة وأماكن النزول وغيرها.

 

مطالبات بخطوط جرين باص في بقية مناطق القاهرة والجيزة

بعد النجاح المذهل اللي حققته خطوط جرين باص في قلب القاهرة ووصولها لحد منطقة الهرم، بدأ الكثير من أهالي بقية مناطق القاهرة بالمطالبة بتوفير خطوط جرين باص عندهم لترحمهم من الحر والزحمة خصوصًا مع عدم وصول مترو الأنفاق لهم، وجاري فعلًا توسيع نطاق الخطوط مع حساب التكلفة الإجمالية.

 

هل فيه مواصلات تانية مكيفة ورخيصة زي خطوط جرين باص؟

فعلا فيه أكتر من خط مواصلات مكيف ورخيص وبيتعامل بالتكنولوجيا الحديثة زي جرين باص، ومن أهمها:

خطوط مواصلات سويفل Swvl

ودي من خطوط المواصلات المميزة جدًا في القاهرة واللي بيزيد الإقبال عليها يوميًا ولكنها مش تابعة لهيئة النقل العام وتعتبر أوفر كتير من سيارات الأجرة وكمان بتروح بيك مشاوير بعيدة بتكلفة من 22-40 جنيه، وممكن الحجز من خلال التطبيق، وكمان لو رحلتك ثابتة يوميًا بتعمل زي اشتراك بيوفر لك نص السعر تقريبًا وبمنتهى الراحة من غير أي بهدلة.

 

كريم

في 3 ديسمبر 2018 أعلنت شركة كريم إنها هتقدم خدمة حافلات جديدة في مصر، وكل اللي عليك هو تحميل التطبيق الجديد لخدمة Careem Bus وده بيسمح لك بحجز الرحلة وتحديد اماكن الاستلام والتوصيل، وهي بتغطي المناطق الرئيسية في القاهرة زي المعادي والسادس من أكتوبر والقاهرة الجديدة ووسط البلد وعندها 25 حافلة.

 

أوبر

وده من أشهر شركات النقل الخاصة في مصر، والأتوبيسات بتاعته شغالة من الأحد للخميس بس ومن الساعة 7.5 صباحًا إلى 7.5 مساءً، وأسعار الرحلات متغيرة وفقًا للمسار، فمكن رحلة من سيتي ستارز لجامعة الدول العربية تكلفك 19 جنيه، ولكن رحلة من شارع شهاب مثلا لميدان التحرير بـ10 جنيه بس، وبرضه لازم تختار أقرب موقع لمسارك لتحديد الالتقاء.

 

شركة مواصلات مصر

ودي تابعة لهيئة النقل العام ومن الخطوط اللي انطلقت في سنة 2020 وفيها برضه واي فاي وشاحن وغيرها، وسعر الرحلة 5 جنيه بس في الميني باص، و10 جنيه في الباص الكبير، ومن أهم مميزاتها إنها بتقدم خدمات خاصة لذوي الإعاقة، وهي منتشرة في وسط البلد ومدينة نصر وإمبابة والتجمع الخامس ومناطق تانية.

 

وفي النهاية فإن خطوط جرين باص وغيرها من خدمات مكيفة بأسعار معقولة في القاهرة دليل جديد على التطورات اللي بنعيشها يوميًا ونتمنى كلنا إن الخدمة تفضل زي ما هي من غير زحمة، خصوصًا إن السائق مبيطلعش حد فوق عدد المقاعد يعني مفيش وقوف.