التطوع في تنظيم كأس العالم لكرة القدم 2022
التطوع في تنظيم كأس العالم لكرة القدم 2022 فتح أبوابه واستقبل حوالي 400 ألف طلب من جميع أنحاء العالم بلا استثناء للمشاركة في أول نسخة من المونديال تتم في دولة عربية أو من دول الشرق الأوسط.
الحدث مثير جدًا للعرب لإنهم لأول مرة ممكن يحضروا كل الماتشات ويسافروا بأقل تكلفة لإن طبعًا السفر والمسافة لقطر غير أي دولة أوروبية أو أمريكا سواء الشمالية أو الجنوبية.
لكن كمان فرص التطوع أكثر واقعية بالنسبة للمصريين والعرب، خصوصًا إن السنة دي وفي النسخة دي تم الإعلان إن تذاكر السفر هتكون مجانية وفيه وجبات كويسة ومكان للإقامة، يعني حلم لأي شاب أو شابة عايزين يشوفوا كأس العالم عن قرب لكن الحالة المادية منعاهم.
دلوقتي كشاب عربي أو مصري عندك فرصة حقيقية للسفر ومشاهدة بعض المباريات مجانًا ولكن أكيد مش كلها، وطبعًا زي ما تحب ساعتها أو زي ما وقت الشغل بتاعك هناك يسمح.
إيه نظام التطوع في تنظيم كأس العالم لكرة القدم 2022؟
بمنتهى البساطة هتزور موقع تنظيم المتطوعين في مونديال 2022 من خلال اللينك ده وهتعمل تسجيل دخول ببياناتك الحقيقية ووظيفتك وسنك وبلد الإقامة واللغات اللي بتتقنها وغيرها، وهتجاوب على مجموعة من الأسئلة وهتختار كمان تخصص أو أكتر ممكن تشتغل فيه هناك، وبناء على الإجابات دي هتتم تصفية المشتركين واختيار المجموعة المطلوبة منهم واللي لسة محدش عارف مطلوب كام بالضبط، لكن أكيد مش 400 ألف اللي متقدمين.
بس لو عرفنا إن فيه أكتر من 1500 متطوع شاركوا في تنظيم كأس الأندية 2020 فده ممكن يدينا فكرة عن العدد المطلوب واللي مش ممكن يقل عن 3 آلاف شخص.
وطبعًا ممكن عوامل تانية تتدخل في الاختيار زي نوع الوظائف اللي عايز تشتغلها ودرجة الإقبال عليها، وهل إنت من مكان متقدم منه ناس كتير ولا لأ، لإنهم عايزين يدوا فرصة لكل الجنسيات إنها تشارك.
إيه اللي هتعمله لو تم قبول طلبك؟
هيتم التواصل معاك من قبل إدارة تنظيم المونديال وعن طريق ممثلي الفيفا في بلدك للتنسيق للسفر، وبعدين هتعرف المهام اللي هتقوم بيها هناك، والأفضل ليك إنك تختار أكثر من تخصص علشان فرصتك تكون أكبر وفي العادي الشغل بيستمر 8 ساعات، وأهم المهام اللي بيقوم بيها المتطوعين في المونديال:
· تنظيم الفعاليات السابقة للمونديال واللي بتكون بعده سواء من خلال إرسال الدعوات وطباعة التذاكر أو كتابتها وغيرها من أمور تنظيمية.
· الضيافة: من خلال تقديم الوجبات والمشروبات في الملاعب لكبار الشخصيات واللاعبين وغيرهم.
· التسويق والاتصالات: وده هيشمل الترويج للعلامات التجارية الراعية للمونديال وإجراء الاتصالات المختلفة سواء بالتليفون المحمول أو البريد الإلكتروني وغيرها.
· إدارة وتنظيم الجماهير: من خلال إرشادهم لأماكن الجلوس ومناطق الدخول والخروج وأماكن الخدمات والطعام وغيرها والإبلاغ عن أي مشاغبات.
· الأمن: وده تدخل فوري في حالة أي مشاغبات
· التواصل الاجتماعي: من خلال استلام الردود على أي منشورات للمونديال بتستفسر عن أي حاجة متعلقة بطريقة التنظيم أو مواعيد المباريات أو غيرها.
· المواصلات: يعني ممكن يتطلب منك قيادة أتوبيسات الجماهير أو الأتوبيسات العامة لو إنت مؤهل لكده.
· تقديم الخدمات الطبية: سواء للجماهير أو الضيوف.
· الفندقة: لإن بيكون طبعًا فيه ضغط كبير على الفنادق ومش ممكن توظيف أعداد كبيرة جدا، وممكن طبعًا تتلقى بقشيش من خدماتك ولكنه مش أكيد.
· مساعدة كبار الشخصيات: يعني ممكن تكون ملازم بس لمجموعة من كبار الشخصيات من الدول المختلفة لتلبية طلباتهم ومنع أي مضايقات، هم طبعًا هيكون معاهم فريق حراسة لكن من الأفضل يكون فيه حد من إدارة تنظيم المونديال معاهم، وطبعًا ده ممكن يفتح لك أبواب كتيرة جدًا.
وفرصة التطوع في تنظيم مونديال 2022 في قطر هتعرفك على شعوب وثقافات مختلفة وهتفتج قدامك فرص عمل كتير جدًا بعد كده سواء في البلد نفسها أو مع الناس اللي هتتعامل معاهم هناك، علشان كده أوعى تتردد في إنك تسجل دلوقتي وتحصل على فرصة كبيرة زي دي مش هتخسر منها أي حاجة بل بالعكس هتستفيد كتير جدًا.
