بير صوير.. حمّام سباحة جوّه الجبل وأشهى أكل في حياتك
بير صوير هو منطقة مذهلة في محافظة جنوب سيناء بتوفر لك منظر مذهل على خليج العقبة بالإضافة للقرب من مجموعة كبيرة من الأماكن السياحية والدينية في شرم الشيخ، وكمان هتلاقي حمام سباحة جوّة الجبل ممكن تنزله صيف أو شتاء بالإضافة لطبيعة ساحرة بكل معنى الكلمة، والمفاجأة إن الرحلة لهناك مش غالية على الإطلاق وممكن بـ20 دولار بس تقضي أجمل يوم وليلة في حياتك.
إيه نظام الإقامة في بير صوير
بير صوير موجود فيه أكتر من منتجع صحراوي كلهم بينافسوا بعض في تقديم أفضل الخدمات، وعمومًا المنطقة بعيد عن مطار شرم الشيخ حوالي ساعتين بالعربية فهو بالظبط على طريق طابا نويبع وبيطل على منظر مذهل على البحر الأحمر وتقدر تستمتع برياضات وأنشطة ترفيهية ورحلات متعددة هناك، غير لو عايز الاسترخاء والهدوء فهو ده المكان اللي مش هتلاقي استرخاء في أي منطقة أكتر منه.
إيه الخدمات اللي بتوفرها منتجعات بير صوير؟
منتجعات بير صوير عبارة عن معسكرات وخيم وأكواخ صديقة للبيئة لكنها مزودة بالكهرباء والمياه ووسائل الراحة المختلفة لكن بتخليك تعيش أجواء الحياة البدوية من غير معاناة بالإضافة إلى حفلات الموسيقى والرقص والشواء المتنوعة.
وغالبًا بيكون متوفر واي فاي مجاني في أماكن الإقامة بالإضافة إلى المفروشات المريحة وخدمات التنظيف وطبعًا الأكل المشوي والشاي البدوي.
ممكن تعمل إيه في بير صوير؟
فيه أنشطة كتير جدا ممكن تقوم بيها في بير صوير ومن أهمها:
· السباحة طبعًا في البحر الأحمر بمياهه الدافئة ووالنقية جدًا في المنطقة دي.
· الغطس مع مدرب متمرس
· الغوص الحر
· بتوفر لك المنتجعات إمكانية الحصول على حمام شمسي وسط البحر مش بس على الشط.
· استكشاف سيناء بسيارات لاند كروزر أو على الجمال
· القيام برحلات جبلية مبهرة.
· رحلات صيد برضه بالاتفاق مع المنتجع محل الإقامة.
· التسوق والشراء.. أيوة متستغربش لإن فيه بازارات في كل مكان.
هل ممكن العائلات تتبسط في بير صوير؟
معروف طبعًا إن رحلات الغطس والجبال والوديان من اهتمامات الشباب أكتر من الأسر والعائلات، لكن لو حابب تطلع مع أسرتك واحد من أجمل الأماكن في الدنيا فممكن طبعًا خصوصًا إن فيه رحلات بالقوارب وسط البحر غير المنظر الجميل على البحر وكل الخدمات الشاطئية المختلفة زي أي مكان على البحر خصوصًا إنها مناسبة للزيارة صيف وشتا.
هل ممكن القيام برحلات من بير صوير؟
بير صوير نفسه رحلة رائعة، ولكن علشان تكون عملت كل اللي نفسك فيه فغالبًا المنتجعات بتوفر لك رحلات مختلفة بمصاريف إضافية، ومن أهم الرحلات اللي بتخرج عادة من بير صوير:
· جولة في سانت كاترين بمتوسط 90 جنيه للفرد
· جولة في كانيون ملوَّن بمتوسط 90 جنيه للفرد
· وايت كانيون بمتوسط 150 جنيه للفرد
· رحلات الصحراء وعربات الشاطئ بـ150 جنيه للفرد في المتوسط
· رحلات القوارب والغطس والغوص بمتوسط 150 جنيه للفرد.
· رحلة إلى البتراء في الأردن خلال النهار فقط ودي بتوصل إلى 230 دولار للفرد.
· رحلة إلى القدس برضه خلال النهار ودي بـ230 دولار للفرد في المتوسط
· رحلة إلى الوديان الملونة في سيناء زي الوادي الملون والوادي الأبيض والوادي المقدس
· التخييم في قلب سيناء وبين وديانها المقدسة بجوار واحة مياه طبيعية عذبة ودافئة.
وطبعًا متوسط الأسعار بيختلف من منتجع للتاني وبرضه في فترات الذروة السياحية، ولكن عمومًا الأسعار بتكون متقاربة إلى حد كبير في منتجعات بير صوير اللي بيعتبر من أجمل الأماكن في محافظة جنوب سيناء وكمان بتقدر منه بسهولة توصل لمناطق كتير مبهرة زي دهب والبلو هول وغيرها من أجمل أماكن.
درب سينا.. أفضل مكان ممكن تزوره في العالم
.jpg)
