مواصلات كايرو فيستيفال من رمسيس
لو بتدوَّر على مواصلات كايرو فيستيفال من رمسيس فهتلاقي أكتر من اختيار، منهم اللي بينزلك بالظبط قدام المول الضخم، ومنهم اللي بيوصلك لشارع التسعين ومن هناك ممكن تركب أي ميكروباص أو تاكسي.
فين موقع كايرو فيستيفال بالظبط؟
كايرو فيستيفال يعتر واحد من مشاريع تطوير مجموعة الفطيم العقارية اللي بيعتبر واحد من المشروعات الإماراتية العملاقة في مصر، وهو عبارة عن مجتمع متكامل ومتعدد الاستخدامات وموجود بالظبط شرق الطريق الدائري في القاهرة الجديدة، مصر، وشمال شارع التسعين.
وكايرو فيستيفال سيتي ممتد على مساحة 3 مليون متر مربع أو 700 فدان، وبتتكوِّن من فيلات سكنية وشقق ومناطق تجارية ومراكز تسوُّق ومدارس ومساحات مكتبية، وهو بيعتبر دلوقتي واحد من أكبر وأضخم مراكز التسوق في القاهرة الجديدة، وهو بيخدم مش بس سكان التجمع ولكن كتير من سكان القاهرة والجيزة بيحبوا يروحوا يتفسحوا ويشتروا طلباتهم من هناك.
إيه هي مواصلات كايرو فيستيفال من رمسيس؟
ممكن نعتبر إن مواصلات كايرو فيستيفال من رمسيس بتتقسم إلى 3 أنواع:
الأول مباشر بين رمسيس وكايرو فيستيفال
.jpeg)
وهتلاقي مواصلتين لحد دلوقتي وهم:
· خط 1064، وده بيبدأ من العتبة وبعد كده رمسيس وبيعدي قدام كايرو فيستيفال بالظبط وبينها وبين رمسيس 11 محطة وهي غمرة والدمرداش والعباسية ونادي السكة وجامعة الأزهر والحي السادس ومصطفى النحاس والتبه والحي العاشر والزهراء والدائري، يعني لو أي محطة فيهم أقرب ليك ممكن تركب منها بدل ما تروح رمسيس مخصوص.
· خط 579، وده من خطوط أتوبيسات الألف مصنع وسعر التذكرة من رمسيس لشارع التسعين 6 أو 7 جنيه، وهو بيبدأ من أحمد حلمي وتاني محطة ليه هي رمسيس، وبينه وبين كايرو فيستيفال برضه 11 محطة هي غمرة والدمرداش والعباسية ونادي السكة وطريق النصر ورابعة وشارع الطيران والحي السابع وزاكر حسين والحي العاشر والزهراء، وآخر محطة للخط ده هو الألف مصنع.
الثاني وهي مواصلات كايرو فيستيفال من رمسيس عن طريق شارع التسعين:
وهتلاقي حوالي 3 مواصلات بين رمسيس وشارع التسعين وزي ما قلنا فالمدينة شمال الشارع ده، وممكن من أي مكان منه تاخد ميكروباص أو تاكسي حاجة بسيطة، ومن أهم المواصلات بين رمسيس وشارع التسعين:
· 1062، وده تابع لموقف نادي القاهرة الجديدة رويال، وسعر التذكر فيه 7 جنيه، وأوله في نادي القاهرة الجديدة وآخره عبد المنعم رياض، وتاني محطة ليه هي رمسيس، وممكن توصل بيه لشارع التسعين وبينهم 9 محطات بس.
· خط 104 وهو مكيَّف وسعر تذكرته 8 جنيه، وبيبدأ من نادي رويال وآخره برضه عبد المنعم رياض وبيعدي في النص على شارع التسعين ورمسيس.
· خط 1018 وهو من خطوط التجمع الثالث ويبدأ من عند الجامعة الألمانية وآخره في أحمد حلمي وبيعدي في النص على رمسيس وشارع التسعين.
الثالث وهي ومواصلات كايرو فيستيفال من رمسيس عن طريق الحي العاشر
فمن الحي العاشر فيه ميكروباص التجمع وده بينزلك مباشرة قدام كايرو فيستيفال، وهتلاقي أكتر من وسيلة مواصلات بين رمسيس والحي العاشر ومنها:
· خط 1001 وده تابع لخطوط الألف مصنع وبيبدأ من التجمع الأول وآخره في عبد المنعم رياض وبيقف في رمسيس وفي الحي العاشر.
· خط 1078 وبرضه تابع لخطوط الألف مصنع وأوله في التجمع الاول وآخره عند المطبعة، وبين رمسيس والحي العاشر 9 محطات بس.
· خط 1012، وبيبدأ من التجمع الأول وآخر في إمبابة.
· خط 30 وده آخره التحرير ويعتبر رمسيس هو المحطة قبل الأخيرة، وأوله في التجمع الأول.
وفي الآخر بعد لما عرفت وسائل مواصلات كايرو فيستيفال من رمسيس، فبرضه لو رحت زهراء مدينة نصر من رمسيس هتلاقي حاجات كتير مباشرة من هناك للتجمع الخامس وكايرو فيستيفال سيتي.
مقالات ذات صلة
مواصلات من مطار القاهرة إلى رمسيس
الفرق بين المطار القديم والجديد في القاهرة
