فاميلي بارك.. مصيف وسينما وتعليم في نفس الوقت
تعتبر فاميلي بارك واحدة من أجمل مناطق الخروج والفسح في القاهرة، ومناسبة جدًا للكبير والصغير، وكمان تعتبر قريبة مش بعيد، فسواء كنت في القاهرة أو السويس أو الإسماعيلية أو في واحدة من المدن الجديدة زي الشروق والعبور ومدينتي فهتقدر توصل ليها بمنتهى السهولة.
إيه أهم الأنشطة الترفيهية في فاميلي بارك أو حديقة الأسرة
هي بصراحة اسم على مسمى، ففعلًا مناسبة جدًا لكل أفراد الأسرة حتى الشباب والمراهقين هيلاقوا فيها اللي يبسطهم سواء دراجات أو ملاهي أو ركوب الشلالات وغيرها.
أما الأطفال ففيه ملاهي مخصوصة ليهم وسينما 3D غير الملاعب، وهتلاقي كمان مطاعم متنوعة جدًا والرحلة النهرية ومسرح متنوع بيقدم عروض مسلية جدًا غير مساحات مخصصة للعب الأطفال الصغيرين.
أما السفاري فيها فمميز جدًا وهتقدر تشوف الحيوانات المختلفة وجهًا لوجه وبأمان تام من غير أي خوف على الأطفال فهي زي حديقة حيوانات مفتوحة.
وفيه كمان عرض الصوت والضوء المبهر عن القوات المسلحة واللي بيستمتع بيه الكبار والصغيرين خصوصًا مع التقنيات الحديثة والإضاءة والصوت.
فين مكان فاميلي بارك
فاميلي بارك موجودة في طريق القاهرة السويس في مدخل الرحاب 2 بجوار فندق توليب على مساحة 80 فدان، وهي طبعًا لازم تروحها إما بسيارة ملاكي أو تكون متفق مع مكروباص أو تاكسي أو هتطلب أوبر يروح لك هناك.
وممكن تروح بميكروباص عادي من موقف كوبري الدائري في المنيب، ولكن في الرجوع لازم تكون متفق مع عربية أفضل خصوصًا إنه في وسط طريق القاهرة السويس وغالبًا مش هتلاقي عربية تقف بسهولة.
وممكن كمان تركب المترو وتنزل محطة سراي القبة ومن هناك تركب أتوبيس الرحاب وتنزل عند البوابة 2، ولكن برضه هتفضل مشكلة الرجوع خصوصًا لو أتوبيس الرحاب خرج مليان من المدينة.
أسعار تذاكر فاميلي بارك
.jpg)
سعر التذكرة بيختلف في الأيام العادية عن الأعياد والمواسم، فهتلاقيها 50 جنيه للفرد في الأيام العادية ووسط الأسبوع، و60 جنيه في الأجازات والمناسبات، وهي بتكون شاملة دخول حديقة الحيوان والسفاري وكمان المتحف المفتوح وعرض النافورة الراقصة.
وهتلاقي جوّة مسرح بيقدم تنورة قبقاب وشو بكار ومزمار بلدي وغيرها وده برضه ضمن التذكرة، وبالنسبة للأطفال فمن فوق 4 سنوات بيتحسب فرد كامل.
كمان لو هتصور هناك بكاميرا احترافية هتدفع 750 جنيه على الباب أما لو بكاميرا ديجيتال صغيرة فهيكون 500 جنيه فقط، وممكن تصور بالموبايل زي ما انت عايز ومجانًا من غير أي رسوم.
إيه الأنشطة اللي خارج تذكرة الدخول
الحقيقة الأنشطة جوة متنوعة جدًا وفهي منها ضمن تذكرة الدخول سواء 50 أو 60 جنيه وفيه منها اللي بيتدفع له رسوم منفصلة زي:
· ركوب الطفطف، وده بيلف بيك الحديقة كلها ولمدة ساعة على الأقل وسعر الفرد فيع 20 جنيه.
· المركز الاستكشافي، وده بيقدم تجارب علمية وعملية للأطفال من سن 3 سنين زي اللي بياخدوها في المدرسة وسعر التذكرة ليه 20 جنيه.
· مركز الحواس الخمس، وده ثقافي ترفيهي للأطفال بيتكلم عن جسم الإنسان والحواس وطريقة تركيب الأجهزة في الجسم ووظيفتها وغيرها، وسعر التذكرة 15 جنيه.
· متحف الحضارات المصرية، وده بيقدم لك 4 عصور مختلفة من الحضارة المصرية بدءًا من الفرعونية ثم الرومانية والإسلامية والحديثة مع عرض مبهر عن حرب أكتوبر والثورات المصرية، والدخول بـ20 جنيه.
· النهر السحري، وده بتركب فيه داخل قارب دائري ممكن يستحمل من 4 إلى 6 أفراد وبيلف بيك في البحيرات الصناعية ومنطقة الشلالات وده تذكرته بـ50 جنيه.
· دخول السينما الـ3D بتذكرة منفصلة بتوصل 20 جنيه.
هل فيه أكل في فاميلي بارك
فيه مطاعم كتير جدًا في الحديقة وممكن تدخل بساندوتشات ومية عادي، وكمان مطاعم Food court متنوعة سواء بيتزا أو ساندويتشات جاهزة أو مشروبات وأسعارها مش مختلفة كتير عن برّة، ولو رايح مع خطيبتك وعايز تبسطها ففيه مطعم مميز جدًا على البحيرة.
