أماكن تصوير فوتوسيشن في القاهرة
أماكن تصوير فوتوسيشن في القاهرة منتشرة جدًا، فسواء حدائق أو أماكن أثرية أو صحراوية أو حتى على النيل وكمان أماكن مطرقعة تنفع لجلسة تصوير كاجوال، وغيرها، وهتلاقي الأسعار كمان متنوعة جدًا بين اللي مجاني تمامًا وهتتحمل بس تكلفة الكاميرا، وبين اللي أسعار الدخول فيه من 500- 1500 جنيه.
جزيرة المعادي
ودي فعليًأ واحدة من أشهر أماكن تصوير فوتوسيشن في القاهرة على الإطلاق، فهي أولا بتطل على النيل ومساحتها كبيرة جدًا وجميلة فعلًا والأماكن فيها متنوعة، وكمان جلسة التصوير فيها أرخص من غيرها، فالدخول هيكلفك 500 جنيه، لكن حاول تبعد عن أيام الأجازات لإنها بتكون زحمة في الوقت ده.
حديقة الأسماك
وهي طبعًا واحدة من أشهر أماكن الترفيه في القاهرة من سنين كتير وظهرت في أجمل الأفلام، وتم تجديدها في بداية الألفية الثالثة ومؤخرًا بقت واحدة من أشهر أماكن تصوير الفوتوسيشن في القاهرة سواء للعروسين أو الموديل أو الفنانين، والمناظر هناك مش ممكن تتصور جمالها خصوصًا على الجبلاية، وهتقطع تذكرة رسوم تصوير بـ250 جنيه.
قصر البارون من أماكن تصوير فوتوسيشن في القاهرة
وده بقى للناس اللي مزاجها عالي قوي، فهناك هتستمتع بخصوصية تامّة وصور تجمع بين التاريخ والرعب وأجمل مناظر الحدائق مع الأناقة والفخامة، ولكن مفيش توصير جوّة القصر لعدم وجود أي إضاءة غير لو هتتصور الصبح مثلًا، ولكن التصوير من برّة ملهوش حل، لكن هتحتاج تصريح أمني بيتكلف من 500-900 جنيه، بالإضافة لرسوم التصوير واللي بتكون 1200 الصبح و1600 بالليل.
الأهرامات
.jpg)
ودي حالة من الرومانسية والأناقة والجمال في نفس الوقت، والميزة فيه إنه من أرخص أماكن التصوير يعني هتتكلف يادوب سعر تذكرة الدخول اللي هي 5 جنيه، ولكن للأسف التعامل الأمني بيكون صعب شوية، ومحتاج تظبط البائعين الجائلين بشوية بقشيش علشان ميرخموش عليك وينطوا في الصور، أو يكون معاك مجموعة من أصحابك يقوموا بالواجب ويبعدوا المتطفلين.
حديقة الأندلس
وهي من الأماكن المتميزة جدًا في مدخل منطقة الزمالك، وهتلاقي فيها كل اللي نفسك فيه بداية من الآثار الإسلامية الأنيقة والعريقة لتقسيمة حدائق مذهلة مع ألوان متنوعة، هتحس فيها إنك بتتصور كأمير وأميرة مش بس عريس وعروسة، وطبعًا غير القسم الفرعوني، وتذكرة دخول الحديقة 5 جنيه، أما سعر التصوير أو رسوم دخول الكاميرا 400 جنيه.
سفاري بارك
ودي موجودة في الجيزة وبتتميز بالأناقة والبساطة مع طابع ريفي مصري مميز جدًا وقنوات مية في كل مكان مع السواقي الخشب غير الخضرة اللي في كل مكان بالإضافة للجسور والكهوف اللي ممكن إضاءتها تتظبط مع المصوِّر وسعر تذكرة الدخول من 10-15 جنيه وفقًا لليوم اللي هتروح فيه أجازة ولا وسط الأسبوع، ومفيش أي رسوم لدخول الكاميرا غير إنها هادية مش هتلاقي حد ينط في الصور ويبوظها كل شوية.
حديقة الأسرة
وهي من الأماكن غاية في الفخامة والأناقة والجاذبية واللي تم افتتاحها من فترة قريبة، وهتلاقي فيها مساحات خضراء كبيرة جدًا مع أشجار ونخيل وقنوات مائية كمان، وسواء بالليل أو بالنهار هتكون من أجمل جلسات التصوير اللي ممكن تتخيلها على الإطلاق، ولكن للأسف هي من الأماكن الغالية في التصوير، فتكلفة دخول 4 أفراد فقط مع الكاميرا هي 1500 جنيه.
ولو عايز أماكن تصوير فوتوسيشن في القاهرة تكون مطرقعة وكاجوال سواء للخطوبة أو لتصوير قبل الزفاف ففيه أماكن مجانية تمامًا زي مدخل مدينتي، وكمان في الأوبرا وممكن تروح أفريكانو بارك وسط مناظر متميزة وأجمل الحيوانات البريّة.
أجمل الأماكن حول العالم ... لقضاء شهر العسل
