حديقة الثعابين في دهب

حديقة الثعابين في دهب.. الأكثر رعبًا وجمالًا لعشاق الغطس

حديقة الثعابين في دهب من المناطق المذهلة التي تم اكتشافها مؤخرًا، وهي واحدة من أكثر المناطق المرعبة والجميلة في الوقت نفسه لعشاق الغطس، وده لإن الحديقة دي كلها أسفل الماء، أيوة أسفل الماء، فإيه حكايتها وازاي تروحها وهل هي خطرة ولا لأ.. كل ده هنعرفه دلوقتي.

ليه اسمها حديقة الثعابين في دهب؟

وده أول سؤال هيخطر على بالنا أو بال أي حد يسمع بالاسم، يعني فيه جناين وشجر والثعابين بتتمشى بينها؟ لأ خالص، لإن الموضوع كله وبمنتهى البساطة هتلاقي الثعابين طالعة من الجحور زي فروع الشجر وعددها كبير جدا، وهتبان من بعيد إنها مزروعات لإنها سبحان الله مش بتخرج من قاع البحر يعني ثابتة في حفر زي النباتات بالظبط.

هل حديقة الثعابين في دهب منطقة خطر؟

لأ على الإطلاق، كل اللي راح استمتع بالمياه الهادئة وجمال الغوص وسط أجمل المناظر اللي ممكن تشوفها واللي ممكن برضه تسبب لك رعب كبير، ولكن الكل أجمع إن الثعابين دي غير مؤذية للإنسان على الإطلاق وإنها بتتغذى كائنات البلانكتوم الدقيقة جدًا واللي بتكون منتشرة في المياه بشكل طبيعي وبتتحرك مع حركة الكائنات البحرية أو الغواصين.

هل ممكن تتصور وسط الثعابين؟

ده للأسف مش ممكن، لإن الثعابين بتدخل جحورها فورًا لما تحس بأي حركة قريبة منها، لكن لو عايز تتصور هيكون من بعيد أو تاخد لقطات للحديقة نفسها وتلحق تغطس بسرعة قبل ما تدخل الجحر.

واسم الثعابين دي هو أسماك الانقليس وعددها بالمئات في قاع البحر الأحمر وبتعيش على المنحدر الرملي الواسع الممتد على الساحر بطوله، وكمان بتحيط بيها الشعاب المرجانية المتنوعة والملونة واللي بتوفر تجربة غطس مذهلة لعشاق جمال الطبيعة الساحر أسفل الماء عمومًا وفي البحر الأحمر خصوصًا.

إزاي ممكن تروح حديقة الثعابين في دهب؟

ممكن عن طريق الشركات السياحية اللي في دهب أو عن طريق الفندق اللي إنت مقيم فيه، وأصلا معظم الرحلات لدهب دلوقتي بتحط في برنامجها رحلة حديقة الثعابين وخصوصًا بعد لما قناة ناشيونا جيوجرافيك اختارت شاطئ دهب كأفضل شاطئ في منطقة الشرق الأوسط وده خلى دهب ترند رقم واحد في السياحة داخل مصر.

هل حديقة الثعابين عايزة أي إجراءات خاصة؟

مفيش إجراءات خاصة بحديقة الثعابين غير إنك تكون بتعرف تعوم ولو على خفيف لإن في كل الأحوال لازم هتكون بصحبة غواص مدرَّب إلا إذا كنت من المحترفين، ولكن من الأفضل دايمًا إنك تستعين بمرشد معاك في الرحلة دي، وعمومًا الأسعار في دهب مش غالية على الإطلاق.

وده رغم لإنها أصبحت ترند عالمي إلا إن البساطة والحياة التلقائية هي السمة الغالبة فيها، علشان كده ممكن رحلة يومين أو 3 بالفطار والغدا تكلفك 900 جنيه بس، وممكن طبعا تعمل حسابك في أكل معاك، فهي مش من المناطق اللي هتلاقي فيها مطاعم فاخرة لكن الأكل فيها حلو ومعمول صح وطبعا هي ممتعة أكتر لعشاق الطبيعة والسفاري والغطس والهدوء الشديد والبعد عن دوشة القاهرة والإسكندرية والمدن الكبرى.

تجربة بجد.. كانيون سلامة ووادي الوشواشي رحلة لن تنساها

أفضل فنادق دهب