أحلى فطار في القاهرة
مش ممكن هتلاقي أحلى فطار في القاهرة أكتر من مطعم الكوخ، وهو بيعتبر معرض فني ومكتبة ومكان للفسحة والضحك والقراءة والحفلات والغدا والعشاء كله في وقت واحد، مش ممكن تكون من وسط البلد ومروحتش المطعم ده، ومش ممكن تكون من القاهرة ومتحاولش تجرَّبه.
إيه أكتر حاجة مميزة في مطعم الكوخ؟
هو فعليًا بيقدم أحلى فطار في القاهرة، ففيه ناس بتقول عليه فطار "أورينتال" يعني شعبي أو أصيل، لكنه فطار متنوع ومتشكل لكل أولاد البلد الأكيلة اللي عايزين يبدأوا يومهم على خير وفي مكان رائع ومتميز مع كوباية شاي مظبوطة من البراد أو كمان قهوة على السبرتاية وينطلقوا للقمة العيش.
إيه هو منيو مطعم الكوخ؟
هو بالنسبة للفطار فهتلاقيه تقريبًا مبيتغيرش يعني صينية فطار معتبرة عليها فول وطعمية وبتنجان مخلل وبيض وبطاطس زي اللي هتلاقيها على أي عربية فول، ولكن المذهل هنا إنك ممكن تفطر وإنت واقف في البلكونة اللي هي عبارة عن لوحة فنية في حد ذاتها.
أو تقعد في مكان على شكل قعدة عربي زي اللي موجودة في سيناء ودهب، أو حتى تقعد وسط مكان زي الغابة بالظبط على كراسي مصنوعة من أغصان الشجر.
لكن بقية المينيو هتلاقيه علطول بيتغير، يعني ممكن مرة تروح تلاقيهم عاملين فتة وكوارع، ومرة ساندوتشات، ومرة بيتزا ومكرونات وأكلات غربية، وكلها بطعم الأكل البيتي المميز.
ربما يهمك أيضًا
أحلي فطار في إسكندرية
هل ممكن تعمل حفلة هناك؟
دي بقى من أجمل الحاجات اللي في مطعم الكوخ، فمش بس هتلاقي أحلى فطار في القاهرة لأ ده كمان ممكن تعمل أجمل حفلة سواء خطوبة ولا عيد ميلاد ولا عيد جواز ولا احتفال بالمولود أو حتى عزومة عادية للأهل والأصحاب وتطلب أحلى أكل مشكل على مزاجك مع جو عائلي مريح، وفي الآخر هتسيب أصحاب المطعم هم يظبطوا كل حاجة.
المكان المفضل للقراء والمفكرين والمثقفين
مطعم الكوخ مش بس بيقدم أحلى فطار في القاهرة لكن كمان ممكن تشتغل فيه على رواقة، فجوة المطعم فيه مكتبة ضخمة هتلاقي فيها أكيد حاجات تلفت نظرك، وممكن ببساطة تفتح أي كتاب وتقرأ فيه بهدوء زي ما إنت عايز، ولو حابب تشتريه بعد كده مفيش مشكلة ولو عايز بس فكرة عنه محدش هيقولك لأ.
علشان كده المطعم ده بيزوره كتير قوي من المفكرين والمبدعين وحتى الشباب العاديين اللي بيحبوا الأماكن المختلفة، فكل ركن فيه هتلاقي إبداعات متنوعة وهتتصور أحلى صور مع أصحابك أو خطيبتك أو حتى أفراد عيلتك.
إذا كنت بتحب الأكل اللي معمول بمزاج عالي ومتنوع وبطعم الحياة المصرية الأصيلة مع فنون تشكيلية ونسمة هوا فأكيد مش هتلاقي أفضل من المطعم ده.
العنوان: 1 شارع سكة الفضل، متفرع من شارع طلعت حرب، عمارة فندق فالنسيا، الدور التاني، بجوار حلواني العبد، و بابا عبده بتاع المكروونة.
التليفون: 01026514158
كافيهات للشغل والمذاكرة في القاهرة
