أفضل مطاعم بمنطقة أطفال في القاهرة

أفضل مطاعم بمنطقة أطفال في القاهرة

كتير بندوّر على أفضل مطاعم بمنطقة أطفال في القاهرة أو إسكندرية أو أي مدينة تانية، فالمطاعم اللي فيها كيدز اريا أو منطقة خاصة للأطفال في تزايد كبير وليها شعبية مش ممكن تخيلها، وده لإن الأطفال بتزهق جدا من قعدة الترابيزة والمطعم وانتظار الطلبات، وعادة مبيكونوش عايزين يبطلوا جري وتنطيط في المكان كله سواء قبل الأكل أو بعده.

علشان كده اخترنا لم أفضل مطاعم بمنطقة أطفال في القاهرة علشان تستمتع بخروجة جامدة جدًا مع أسرتك من غير ما كل شوية تتخانق مع أطفالك علشان يقعدوا هاديين.

1. مطعم تشيليز Chili’s:

وهو من الأماكن المميزة جدًا للخروج في القاهرة، وكمان موجود في أكتر من منطقة يعني هتلاقية في القاهرة الجديدة والمهندسين وكمان الشيخ زايد، وكمان في مصر الجديدة، ومنطقة الأطفال فيه من أحلى الأماكن وفيها ألعاب ومنطقة عشبية وهو نفسه عادة بيكون في مكان مفتوح وجنب نافورة أو مية وده بيخلي القعدة هناك ملهاش حل.

عناوين تشيليز:

·         6 اكتوبر في مول مصر

·         التجمع الاول في بورتو كايرو مول ،الطريق الدائري

·         الزمالك في مدينة النيل، شارع سراي الجزيرة

·         الشروق في مدينتى، ساوث بارك

·         القاهرة الجديدة في كايرو فستيفال سيتى، الطريق الدائرى

·         القرية الذكية في داندي ميجا مول، KM 28 طريق الإسكندرية الصحراوي

·         المعادى في سيتى سنتر، الطريق الدائرى

·         المهندسين في 2 ش الفواكة، بجوار مسجد مصطفى محمود

·         طريق اسكندرية الصحراوى في داندى مول

·         مدينة نصر في سيتي ستارز سنتر، شارع عمر بن الخطاب، المرحلة 1، الطابق الخامس

·         مساكن شيراتون في صن سيتى مول

·         مصر الجديدة في تيفولى دوم مول, ميدان الماظة

·         مول البندر في 1 شارع فلسطين

·         مول العرب في ميدان جهينة

التليفون: 19002

2. مطعم أم حسن:

وده منطقة الأطفال فيه بعيدة شوية عن صالة الطعام، ولكنها مميزة جدًا ومساحتها مناسبة قوي للأطفال من سن 5-10 سنوات، وفيها مراجيح وألعاب مختلفة، ده غير طبعًا منيو مطعم أم حسن الجبار واللي بيعتبر من المطاعم الشرقية المتميزة جدًا في القاهرة، وهو برضه ليه أكتر من فرع علشان يكون قريب منك في أي مكان انت فيه.

عناوين أم حسن:

مدينة نصر في شارع عباس العقاد، وده الفرع الرئيسي.

المهندسين في شارع البطل أحمد عبد العزيز

التليفون: 19500

3. مطعم أندريا:

وهو بيعتبر واحد من أكبر وأجمل المطاعم المفتوحة في القاهرة، وهتستمتع بيه جدًا في أوقات الربيع والخريف فالجو بيكون مش محتاج أي مراوح أو تكييفات، وكمان الأكل هناك مميز جدًا وبيرضي أذواق كتير، فهتلاقي الأكل المصري مع المشويات والفطائر وغيرها.

وممكن كمان تطلب حلويات وعصائر وبس، ومنطقة الأطفال حلوة جدا ومميزة وواسعة وممكن تكون خروجة في حد ذاتها مع طلبات بسيطة من المطعم.

4. مطعم Cheeky Chimps:

وده من المطاعم المفضلة جدًا للأمهات أيا كان عُمر طفلها، فهم بس مش بيوفروا منطقة للعب الأطفال الكبار اللي قادرين يمشوا ولكن كمان لعمر سنتين، يعني فيه مكان رعاية مخصص ليهم علشان تقدري تخرجي مع أصحابك براحتك حتى لو كان طفلك لسة صغير جدا، وطبعا فيه رقابة صارمة وأمان تامّ على الأطفال.

والمنيو كمان مميز جدا وإن كان أكتر الوجبات فيه من النوع الأمريكي يعني برجر وشاورما وبيتزات وغيرها، علشان كده هو مناسب لخروجات الأصحاب أكتر اللي مبيعرفوش يشوفوا بعض بسبب الأطفال.

العنوان: شارع أبو الفدا- الزمالك

التليفون: 0114 647 4793

5. مطعم Planet Africa:

وده زي ما بيقولوا كده الجايزة الكبرى، فمفيش أي حاجة في المطعم ده مش مبهرة، سواء الديكور المميز جدا واللي هيخليك تحس إنك جوّة غابة، أو منطقة الأطفال المسلية المرحة المليانة بأنشطة مختلفة.

أما الأكل فهو حكاية لوحده ومتنوع جدا سواء لحوم أو سي فود أو دجاج مع سلطات ومقبلات هي مزيج من الأكل الأفريقي والغربي.. حقيقي هتتبسط هناك خصوصًا إن الأسعار مش عالية قوي.

العنوان: سيتي ستارز، شارع عمر بن الخطاب، المرحلة 1، الدور الخامس

التليفون: 01005036960 - 0224802949

6. مطعم بروستد كنج

وهو موجود في العبور في الحي التاسع والحي الأول، وده هتلاقي فيه أجمل لمة عيلة على الإطلاق، فمنطقة الجلوس حلوة جدا، وكمان الكيدذ اريا مجانا طول اليوم، وهو من أكتر الأماكن اللي اتفق عليها ناس كتير إنها حلوة للكبير والصغير وكمان الأكل هناك متنوع ولذيذ.

التليفون: 01010679080

ودي كانت مجموعة من أفضل مطاعم بمنطقة أطفال في القاهرة، وغالبا هتختار اللي أقرب ليك، وإن كان بعضها مميز جدًا بحيث إنك تروح له مخصوص حتى لو من مكان بعيد.

أفضل مطاعم سي فود في القاهرة