أحلى مسمط في القاهرة

أحلى مسمط في القاهرة

لو بتدوّر على أحلى مسمط في القاهرة فأكيد كتير هينصحوك إنك تروح وسط البلد، سواء حي الحسين أو السيدة زينب وعابدين، فهناك هتلاقي أجمد محلات المسامط وأشهرها على الإطلاق، وده مش معناه إن مفيش محلات جامدة جدًا في مناطق تانية زي شبرا الخيمة، ولكن الأشهر على مستوى الجمهورية كلها مش بس في القاهرة هم اللي في وسط البلد.

بييجي ليهم الناس من كل مكان وخصوصًا اللي في الحسين، ورغم إن المحلات نفسها ممكن متكونش شيك جدًا وراقية زي محلات تانية حديثة، إلا إن الطعم الأصيل والنكهة والمعاملة والجو القديم وغيرها كتير مميزات بتنقلك لتجربة تانية خالص غير مجرد إنك تاكل لحمة راس وكوارع وممبار وفواكه اللحمة، فيالا نعرف مع بعض أحلى مسمط في القاهرة.

1. مسمط أحباب الحسين:

وساعات ناس بتقول عليه مسمط حبايب الحسين، وهو واحد من أكثر المحلات المشهورة هناك وهتلاقي كل اللي قلبك يحبه من فتة ولحمة رأي وطحال وكبدة محمرة وغيرها، وفيه كمان توصيل للطلبات.

العنوان: شارع الجمالى متفرع من شارع المنصورية

الدراسة ، القاهرة ، القاهرة الكبرى

التليفون: 25880719-02، 01092006383، 01125251280

2. مسمط عباد الرحمن:

مش ممكن تكون من القاهرة ومتعرفش المحل ده، فرغم إنه صغير جدًا من جوّة إلا إن ليه شعبية رهيبة أجبرت مذيع برنامج الأكيل إنه يطي حلقة هناك رغم إنه مش من هواة لحمة الرأس وده خلى ناس كتير قوي تهاجم المذيع.

فاللحمة الضاني هناك من الأكلات اللي بيتسابق عليها الجميع بالإضافة طبعًا للفشة والكرشة والفتة باللية الضاني اللي عايزة حد أكيل بجد علشان يقدر يهضم الأكل ده.

العنوان: ميدان أبو الريش أمام محطة مترو السيدة زينب

التليفون: 1225875253

3. مطعم المدينة:

وكلمة "ملك المشكل" قليلة جدًا عليه بصراحة، فهناك هتلاقي ابتكارات مختلفة لازم هتحببك في الفشة والكرشة والممبار ولحمة الراس حتى لو مش بتميل ليهم قوي، فهتلاقي مثلا ممبار محشي لحمة مفرومة لمحبي وعشاق الأكل المختلف والمتجدد.

فــــرعنا الوحيـــــد : شارع خيرت - ميدان لاظوغلى - السيدة زينب

التليفون : 0227921817 _ 01140340313

4. مسمط بحة:

وهو من المطاعم المميزة جدًا ومش بعيد قوي عن السيدة زينب، وتعتبر الكوارع مصدر شهرته الأساسية لإنه بيعملها بطرق مختلفة ومتنوعة جدا، كمان اللحوم هناك ملهاش حل، ولو عايز تعيش تجربة المسمط بجد اطلب طبق مسلوق مشكل ومش ممكن هتندم أبدًا لو معدتك حديد.

العنوان: الناصرية- السيدة زينب

التليفون: 1222633211

5. مطعم العهد الجديد:

وهو مش بس هيبهرك بمجموعة متكاملة من أشهى فواكه اللحوم سواء لحمة رأس أو مخاصي أو طرب وكرشة وغيرها، ولكن كمان المشويات هناك ملهاش حل بالإضافة إلى الكفتة والطرب والسمان والكباب.

ولو كنتم مجموعة مع بعض وفيه منكم مبيحبش الأكل ده فهيلاقي بيتزا إيطالي وباستا بالإضافة لتشكيلة متنوعة من الشوربة، وكمان فيه أكل صيامي.

العنوان: شارع جوهر القائد في الحسين.

6. الدهان:

وهو مش بس مسمط، لكنه واحد من أشهر وأجمد المحلات في الحسين على الإطلاق، وهتلاقي هناك كل اللي نفسك فيه وأكتر، فمنذ تأسيسه في سنة 1890 وهو واخد سمعة رهيبة في تقديم أجمل الأكلات، وطبعا فرعه الرئيسي في الحسين في شارع جوهر القائد، ولكن موجود منه دلوقتي في كل مناطق مصر.

وهتقدر هناك تطلب وجبات متنوعة سواء فتة أو كوارع أو مشويات جنبها أو حتى أكلات مصرية شعبية من بامية وملوخية وغيرها.

التليفون: 1205152585

7. مطعم الركيب:

وهو تقريبًا أقدم مسمط متخصص في مصر، وهتلاقي هناك رأس ضاني كاملة وكمان لسان ضاني مع مخ ضاني، وشوربة الكوارع مشكلة لوحدها مع الطواجن وغيرها.

العنوان: 9 شارع الأزهر- العتبة

التليفون: ‏1062406232‏

وأكيد مش هتحتار كتير قبل ما تختار أحلى مسمط في القاهرة، فلو انت محدد هدفك كويس هتلاقي كل مطعم عنده حاجة مميزة جدًا، ولو عايز تجرب لسة يبقى ننصحك بعباد الرحمن أو الدهان.. وبالهنا والشفا.

أفضل مطاعم مشويات في القاهرة